Contoh teks pembawa acara Isra Miraj Bahasa Jawa

Assalamualaikum Wr.Wb.

Katur poro pepunden pinisepuh soho sesepuh ingkang tuhu kinabekten. Dhumateng poro alim poro ulama  poro kyai ingkang pantes kapiji pinongko pangarsaning agami.

Mliginipun dhumateng almukarom Ibu Nyai Saripah ingkang mijil saking Banyubiru ingkang kito tenggo Makhido khasanahipun.

Dhumateng bpk. Kepala Desa Barukan Bpk H.Muhnadzir soho abdi cundokonipun ingkang pinangka pengendalining ing laladan desa Barukan ingkang winantu sakung pakurmatan.

Dhumateng poro pinarak kakung soho putri ingkang dipun mulyaaken dening Allah SWT.

Poro remajawan remajawati soho adik-adik santriwan santriwati ingkang kulo tresnani ugi.

Langkung rumiyin sumonggo kita tansah munjuaken raos pujo miwah puji syukur wonten ngarso dalem Allah SWT. Ingkang sampun pareng pinten pinten kanikmatan soho karohmatan dhumatheng kito sedoyo khususipun nikmat iman lan islam katitik wonten ing kalodangan siang meniko kito saget angrawuhi majelis taklim meniko .

Sholawat ugi salam tansah kunjuk wonten ngarso dalem junjungan kito nabi Agung Muhammad SAW ingkang pinangka uswatun khasanah ugi ingkang saget kito tenggo menggah lumebering syafaat wiwit meniko wekdal ngantos illa yaumil kiyamah . Amin allahuma amin

Poro pinarak kakung soho putri ingkang dahat kinurmatan ,ing siang meniko kulo kajibah ndereaken lampahing adicoro pengetan isra’ mi’raj Nabi agung Muhammad SAW 27 rajab 1438 H

Sakderengipun adicara menika kalampah kepareng badhe kulo aturaken adicara satunggal mboko satunggal.:

1.      Adicara angka setunggal nuwun inggih pambuko kanthi waosan umul kitab.

2.      Adicara angka kalih nuwun inggih kumandanging ayat-ayat suci al-quranul karim ingkang samangkih badhe kawaos dening sederek Erna Kurnia.

3.      Adicara angka tiga nuwun inggih atur pambagyo saking ketua pabitia isra’ mi’raj .

4.      Adicara angka sekawan nuwun inggih sambutan saking bapak kepala desa barukan .

5.      Adicara angka gangsal nuwun inggih kreativitas nasyid lan rebana Al-hikmah.

6.      Adicara angka enem nuwun inggih inti pengaosan ingkang samangkih badhe kabeberaken dwning al-mukarom Ibu Nyai Saripah.

7.      Adicara angka pitu nuwun inggih Doa soho Panutup.

Mekaten menggah rerakitaning adicara ingkang badhe kalampah .Dhumateng poro rawuh sedoyo kasuwun pinarak kanti merdikaning penggalih dumugi purnaning gati .

Hadirin walhadirat rahimakumullah monggo adicara ing siang puniko enggal kawiwitan kanti umul kitab kulo dereaken . Liridoillahi walisyafaati rasulillahi lahumul fatihah .

Mugi kanti waosan umul kitab sepindah kala wau pikantuk berkah ridhonipun Allah SWT .Amin Allahuma Amin.

Adicara angka kalih nuwun inggih kumandanging saperangan kalam wahyu illahi kanti mekaten dhumateng sederek Erna Kurnia wekdal kaaturaken.Dhumateng para pinarak kasuwun danganing penggalih midangetaken .suwun

Shodaqallahuladzim .mekaten kumandanging saperangan kalam wahyu illahi mugi saget nambahi keimanan kita dhumateng Allah SWT . Amin Allahuma Amin

Dhumateng bapak ibu tamu undangan ingkang kulo hormati,menggah tumapaking adicara candakipun nuwun inggih atur pambagyo ingkang badhe kasalirani panjenenganipun Bp.Supangat Suryo Utomo katur panjenenganipun kulo sumanggaaken.

Matursuwun dhumateng bp Supangat Suryo Utomo ingkang sampun kepareng ngaturaken atur pambagyo

Menggah sambutan saklajengipun nuwun inggih sambutan saking pemerintah desa Barukan ,dhumateng Bp. H Muhnadzir ,wekdal kacaosaken wonten ngarso . Sumonggo

Mekaten menggah sambutan saking panjenenganipun bp H Muhnadzir katur panjenenganipun kito aturaken agunging panuwun.

Para rawuh ingkang minulyo adicara candakipun nuwun inggih saking santriwan santriwati badhe ngaturaken kreatifitas nasyid ingkang dipun pimpin panjenenganipun………………

Dhumateng poro rawuh ingkang kulo hormati kepareng adicara badhe kalajengaken kaliyan pengaosan ingkang badhe kaaturaken panjenenganipun Ibu Nyai Saripah ingkang mijil saking Banyubiru,katur panjenenganipun wekdal soho sasono pangandikan kulo aturaken  Sumonggo

Paripurno pengaosan ingkang sampun kabeberaken dening Ibu Nyai Saripah mugi mbekto manfaat maslahat dhumateng kulo dalah panjenengan sedoyo . Amin Allahuma Amin.

Jamaah pengaosan rokhimakumullah ,ndungkap pethiting gati nuwun inggih barokah doa,katur panjenenganipun ………………………… kulo aturaken.  Sumonggo

Paripurnaning dongo mratandai purnaning adicara pengetan isra’ mi’raj Nabi Agung Muhammad SAW ing siang puniko. Ing mriki kulo ingkang tinanggenah ndereaken lampahing adicoro ing siang meniko ing mbok bilih kathah kalepatan anggen kulo matur kulo nyuwun agunging pangapunten.

Akhiripun saking kulo ,Billahitaufik walhidayah wassalamualaikum wr.wb.